दाङ । घोराही दशैं, तिहार तथा छठ पर्वको अवसर पारेर मेधावी कन्सर्नले पुस्तक मेला २०८३ सुरु गरेको छ। चाडपर्वको खुसीसँगै पठन संस्कृतिको विकास गर्ने र पुस्तकलाई उपहारका रूपमा आदानप्रदान गर्ने संस्कारको प्रवर्द्धन गर्ने उद्देश्यले पुस्तक मेला आयोजना गरिएको हो।
मेधावी कन्सर्नका सञ्चालक सूर्य बिसीको अध्यक्षता तथा प्रेस स्वतन्त्रता सेनानी एवं वरिष्ठ साहित्यकार सुशील गौतमको प्रमुख आतिथ्यतामा आयोजित कार्यक्रममा साहित्यकार, लेखक, पत्रकार तथा साहित्यप्रेमीहरूको सहभागिता रहेको थियो।
कार्यक्रममा बोल्ने वक्ताहरूले नेपाली समाजमा चाडपर्वका अवसरमा नयाँ लुगा, मिठाई तथा विभिन्न सामग्री उपहार दिने परम्परा रहे पनि ज्ञान र चेतना अभिवृद्धि गर्ने पुस्तक उपहार दिने संस्कारलाई अझै व्यापक बनाउन आवश्यक रहेको बताएका थिए। उनीहरूले दशैंमा मान्यजनबाट टीका र आशीर्वाद ग्रहण गर्दा तथा तिहार र छठका अवसरमा आफन्तजनसँग भेटघाट गर्दा पुस्तक उपहार दिने अभियान सुरु गर्न आग्रह गरेका थिए।
प्रमुख अतिथि वरिष्ठ साहित्यकार सुशील गौतमले पुस्तक मानिसको जीवनलाई सही दिशा दिने महत्वपूर्ण माध्यम भएको उल्लेख गर्दै पुस्तक पढ्ने बानीले व्यक्तिको सोच, व्यवहार र सामाजिक चेतनामा सकारात्मक परिवर्तन ल्याउने बताउनुभयो। उहाँले पुस्तक मेलाले पाठकलाई पुस्तकसँग जोड्नुका साथै लेखक, साहित्यकार र पाठकबीचको सम्बन्धलाई थप बलियो बनाउने विश्वास व्यक्त गर्नुभयो।
राप्ती साहित्य परिषद्का केन्द्रीय अध्यक्ष कमलमणि देवकोटाले समाजको बौद्धिक विकासका लागि पठन संस्कृतिको विस्तार आवश्यक रहेको बताउनुभयो। उहाँले पुस्तक पढ्ने बानीले मानिसलाई ज्ञानवान्, विवेकशील र जिम्मेवार बनाउन सहयोग गर्ने उल्लेख गर्दै पुस्तक मेलाजस्ता कार्यक्रमलाई निरन्तरता दिनुपर्नेमा जोड दिनुभयो।
साहित्यकार डा. टीकाराम उदासीले पुस्तक मानिसको ज्ञानको भण्डार भएको बताउँदै अध्ययनलाई दैनिक जीवनको अभिन्न अङ्ग बनाउनुपर्ने धारणा राख्नुभयो। उहाँले प्रविधिको बढ्दो प्रयोगसँगै मानिसको पढ्ने बानीमा परिवर्तन आइरहेको अवस्थामा पुस्तकप्रतिको आकर्षण बढाउन यस्ता मेला उपयोगी हुने बताउनुभयो।
नेपाल पत्रकार महासङ्घका केन्द्रीय सचिव एवं साहित्यकार सविन प्रियासनले पठन संस्कृतिको विकासका लागि पुस्तक मेला अनिवार्यजस्तै बनेको बताउनुभयो। उहाँले पुस्तक पढ्ने संस्कारले व्यक्तिको ज्ञान र चेतनाको स्तर उकास्नुका साथै समाजलाई सभ्य, सुसंस्कृत र सकारात्मक दिशातर्फ अघि बढाउन सहयोग गर्ने धारणा राख्नुभयो।
“दशैं, तिहार र छठजस्ता चाडपर्वमा आफन्तलाई टीका लगाइदिएर आशीर्वाद दिने हाम्रो सुन्दर परम्परा छ। अब यही परम्परासँग ज्ञानको उपहार पनि जोड्नुपर्छ। बालबालिकादेखि युवासम्मलाई उनीहरूको रुचि र उमेरअनुसारका पुस्तक उपहार दिने अभियान घरघरबाट सुरु गरौँ,” उहाँले भन्नुभयो।
उहाँले पुस्तक उपहार दिने संस्कारले नयाँ पुस्तामा अध्ययनप्रतिको रुचि बढाउनुका साथै सिर्जनात्मक सोच, सकारात्मक दृष्टिकोण र जीवनोपयोगी ज्ञान विकास गर्न सहयोग पुग्ने बताउनुभयो। पुस्तकलाई केवल पढ्ने सामग्रीका रूपमा नभई मानिसको जीवन बदल्न सक्ने प्रेरणाको स्रोतका रूपमा लिनुपर्ने उहाँको भनाइ थियो।
साहित्यकार सुरेश पाण्डेलगायतले पनि पुस्तकको महत्व, साहित्यिक गतिविधिको प्रवर्द्धन र समाजमा अध्ययन संस्कारको आवश्यकता विषयमा धारणा राख्नुभएको थियो। वक्ताहरूले पुस्तक मेलाले पाठकलाई आफूले चाहेको पुस्तक छनोट गर्ने अवसर प्रदान गर्नुका साथै साहित्यिक सिर्जना र ज्ञानको प्रसारमा महत्वपूर्ण योगदान पुर्याउने विश्वास व्यक्त गरेका थिए।
पुस्तक मेला केवल पुस्तक बिक्री गर्ने माध्यम मात्र नभई समाजमा ज्ञान, विचार र चेतना विस्तार गर्ने अभियानसमेत भएको उनीहरूको भनाइ थियो। विशेषगरी चाडपर्वको समयमा बालबालिका तथा युवालाई पुस्तक उपहार दिने अभ्यासले उनीहरूलाई मोबाइल तथा अन्य डिजिटल सामग्रीमा मात्र सीमित नराखी अध्ययन र सिर्जनात्मक गतिविधितर्फ आकर्षित गर्न सक्ने वक्ताहरूले बताएका थिए।
मेधावी कन्सर्नले दशैं, तिहार तथा छठजस्ता महत्वपूर्ण पर्वको अवसरमा पुस्तक मेलाको आयोजना गरेर पुस्तकप्रेमी, विद्यार्थी, अभिभावक, साहित्यकार तथा पाठकलाई पुस्तकसँग जोड्ने प्रयास गरेको छ। यस्ता कार्यक्रमले पुस्तक पढ्ने वातावरण निर्माण गर्न, साहित्यिक कृतिको पहुँच बढाउन र नयाँ पुस्तामा अध्ययनप्रतिको रुचि जगाउन सहयोग पुग्ने अपेक्षा गरिएको छ।
पुस्तक मेलाको सन्देश स्पष्ट छ—चाडपर्वको खुसीलाई ज्ञानसँग जोडौँ, आफन्तलाई पुस्तक उपहार दिऔँ र पठन संस्कृतिको विकासका लागि घरघरबाट अभियान सुरु गरौँ।
