दाङ । घोराही-तापा सडक खण्ड अन्तर्गत घोराही उपमहानगरपालिका-१ काउले गाउँस्थित गोरबहादुर बिकको घरमा चुनढुंगा बोकेको टिप्पर खसेको छ।
गएराति घरमा टिप्पर खस्दा बिक परिवारका चार जना सदस्य घाइते भएका छन्। घाइतेहरुको स्थानीय अस्पतालमा उपचार भइरहेको छ।
दशैं आएको बेला यो कस्तो दशा लाग्यो भन्दै स्थानीय आक्रोशित बनेका छन्। सडक फराकिलो भएपनि चालकले नियम नमानेर मध्यरातमा समेत तीव्र गतिमा टिप्पर चलाउँदा यस्ता घटना दोहोरिइरहेको स्थानीयको गुनासो छ।
स्थानीयका अनुसार रातको समयमा टिप्पर नचलाउने नियम भएपनि कार्यान्वयन फितलो छ। टिप्परको कारण दिनभर धुलोको सास्ती खेपिरहेका सडक छेउका बस्ती अहिले ज्यानकै जोखिममा परेका छन्।
“धुलो खाएर बाँचेका नागरिकले ज्यानको जोखिम कहिलेसम्म बेहोर्ने ?” स्थानीयले प्रश्न गरेका छन्।
घाइतेहरुको शीघ्र स्वास्थ्यलाभको कामना गरिएको छ भने सम्बन्धित निकायले रात्रीकालिन टिप्पर सञ्चालनमा कडाई गर्नुपर्ने माग स्थानीयले गरेका छन्।
