पर्सा । बिरामी जिल्लामा असोज महिनामा विभिन्न प्रकृतिका १११ वटा आपराधिक घटना दर्ता भएका छन्। जिल्ला प्रहरी कार्यालय पर्साले सार्वजनिक गरेको मासिक प्रगति विवरण अनुसार अपराध नियन्त्रण तथा अनुसन्धानका क्रममा १२० जना प्रतिवादीलाई पक्राउ गरिएको छ।
पर्सा प्रहरी प्रमुख प्रहरी उपरीक्षक (एसपी) पवनकुमार भट्टराईका अनुसार असोज महिनामा सामाजिक अपराधका ६१, संगठित तथा आर्थिक अपराधका १७, चोरीसम्बन्धी ९, ज्यानसम्बन्धी ८, बालबालिकासम्बन्धी ६, सवारी ज्यानसम्बन्धी २ र अन्य प्रकृतिका ४ घटना दर्ता भएका छन्।
विवरणमा कर्तव्य ज्यानको १, हातहतियारसम्बन्धी २, बैंकिङ कसुरका १३, जुवातासका २ र ठगीको १ घटना पनि उल्लेख छ।
*लागुऔषध प्रमुख चुनौती*
पर्सामा लागुऔषध नियन्त्रण प्रहरीका लागि प्रमुख चुनौतीका रूपमा देखिएको छ। असोज महिनामा लागुऔषध सम्बन्धी १६ वटा मुद्दा दर्ता गरी २४ जनालाई पक्राउ गरिएको छ। उनीहरुको साथबाट ३८ किलो ५०८ ग्राम गाँजा, १७१ ग्राम ७९० मिलिग्राम ब्राउन सुगर र १४ ग्राम ६४० मिलिग्राम अफिम बरामद गरिएको छ।
असोजमा ४० वटा सवारी दुर्घटना हुँदा २ जनाको मृत्यु भएको छ भने ३१ जना घाइते भएका छन्। ट्राफिक नियम उल्लङ्घन गर्ने १ हजार ३४४ वटा सवारीसाधनलाई कारबाही गरी १६ लाख ३६ हजार ५०० रुपैयाँ राजस्व संकलन गरिएको छ।
राजस्व चुहावट तथा भन्सार छली नियन्त्रण अभियान अन्तर्गत ७५ लाख ४४ हजार ४९ रुपैयाँ मूल्यका सामान बरामद गरिएको छ। अवैध वन पैदावार नियन्त्रणका क्रममा ७ जनालाई पक्राउ गरी १४ वटा साइकल र ५४ क्युफिट काठ बरामद गरी ३ लाख ११ हजार ६०० रुपैयाँ जरिवाना गरिएको छ।
असोजमा १८ वटा विपद्सम्बन्धी घटना हुँदा १ जनाको मृत्यु, १० जना घाइते र १ जना बेपत्ता भएका छन्। १७ जनाको उद्धार गरिएको प्रहरीले जनाएको छ।
अपराध न्यूनीकरणका लागि जिल्ला प्रहरीले २२५ वटा समुदाय-प्रहरी साझेदारी कार्यक्रम सञ्चालन गरेको र त्यसबाट ४ हजार ७३८ जना लाभान्वित भएको एसपी भट्टराईले बताए। चाडपर्वको समयमा शान्ति सुरक्षा कायम राख्न विशेष प्रहरी टोली परिचालन गरिएको उनले जानकारी दिए।
