ABC (क्राईमबिट)
बर्दिया । नेपाल प्रहरीका कर्मचारी एवं पुर्व प्रहरी तथा अमर प्रहरी परिवारका सदस्यहरुलाई निःशुल्क स्वास्थ्य चेकजाँच, परामर्श र औषधी वितरण गरिएको छ । मध्यपश्चिम क्षेत्रिय प्रहरी अस्पताल नेपालगंज र जिल्ला प्रहरी कार्यालय बर्दियाको संयुक्त आयोजनामा निःशुल्क चेक जाँच गरिएको हो । निःशुल्क स्वास्थ्य शिविर जिल्ला प्रहरी कार्यालयको हाताभित्र भएको हो ।
बर्दिया प्रमुख जिल्ला अधिकारी सन्त बहादुर सुनारले ब्यानर पढेर स्वास्थ्य शिविरको उद्घाटन गरेका थिए । प्रजिअ सुनारले जिल्ला प्रहरी कार्यालयले गरेको स्वास्थ्य निःशुल्क स्वास्थ्य शिविरको प्रसंशा गर्दै पवित्र काम गरेको बताए ।
यस कार्यक्रमले प्रहरी संगठनभित्रका कर्मचारीको अन्तरसम्बन्ध, माया, ममता र स्नेहा बढाउने बताए । यस्ता रचनात्मक कार्यक्रमले पुर्व प्रहरी र बहालवाला कर्मचारीबिचको सम्बन्धलाई कायम राख्ने बताए । राज्यलाई योगदान गरेर घर फर्किएका कर्मचारीलाई यस्ता कार्यक्रममा सारिक गराउँदा संगठनले माया गरेको पुर्व प्रहरीलाई आभास हुने प्रजिअ सुनारले बताए ।
कोभिड महामारीमा अहोरात्र खटिएका प्रहरी कर्मचारीहरुको स्वास्थ्य अवस्थालाई मध्यनजर गर्दै निःशुल्क शिविरको आयोजना गरेको जिल्ला प्रहरी कार्यालय बर्दिया प्रहरी प्रमुख एसपी ईश्वर कार्कीले बताए ।
यस शिविरले गर्दा जिल्लाभित्रका बहालवाला कर्मचारी, पुर्व प्रहरी, अमर प्रहरी परिवारका सदस्यहरुले आफ्नो स्वास्थ्य अवस्थाको चेक जाँच गराएको एसपी कार्कीले बताए ।
शिविरमा नाँक, कान, घाँटी, डेन्टल, अर्थो, गाइनो, बल्ड प्रेसर तथा जनरल ओपिडी सेवा उपलब्ध रहेको थियो । निःशुल्कमा स्वास्थ्य अवस्था बुझि परामर्श र औषधी पाउँदा प्रहरी कर्मचारी खुसी भएका छन् ।
मध्यपश्चिम क्षेत्रिय प्रहरी अस्पताल नेपालगंज र भेरी अस्पताल नेपालगंजका बिशेषज्ञ चिकित्सक सहित १४ जनाको स्वास्थ्यकर्मी टोली द्वारा
शिविरमा स्वास्थ्य चेक जाँच गरिएको थियो । क्षेत्रिय प्रहरी अस्पतालका एसपी डाक्टर अभिमन्यु श्रेष्ठको नेतृत्वमा प्रहरी कर्मचारीहरुको स्वास्थ्यको परीक्षण गरिएको हो । यस निःशुल्क शिविरबाट २ सय २५ जना प्रहरी कर्मचारी लाभान्वित भएको जिल्ला प्रहरी कार्यालय बर्दिया प्रहरी प्रमुख एसपी कार्कीले बताए ।
