(ABC-Sanchar)
काठमाडौँ । मासु व्यवसायीहरूले दसैँमा मासुको मूल्य तोक्ने तयारी गरेका छन् ।
सरकारले मूल्यबारे छलफलमा यो वर्ष पनि नबोलाए पछि खुल्ला बजारमा किसानले तोक्ने मूल्यको आधारमा जिउँदो र तयारी मासुको मूल्य तोक्ने तयारी गरेको नेपाल माछा मासु व्यवसायी सङ्घले जनाएको छ ।
सङ्घका अध्यक्ष रमेश खड्काकाअनुसार पछिल्लो तीन वर्षदेखि सरकारले व्यवसायी सङ्घसँग मूल्य तोक्नेबारे कुनै छलफल नै गरेको छैन । ‘सरकारले छलफल गर्ला र मूल्य तोक्ने भनेर बसेको यो वर्ष पनि कुनै छलफलका लागि बोलावट भएन,’ उनले भने, ‘अब बजारमा मूल्य खुल्ला हुने भयो । मासुको मूल्य जति पनि हुनसक्छ ।’
संघकाअनुसार यो वर्ष खसीको तयारी मासुको मूल्य न्यूनतम् १३ सय रुपैयाँदेखि सुरु हुने देखिएको छ । सरकारले बजारको आपूर्ति हेरेर मूल्यको सीमा नतोक्दा विगतका वर्षहरूमा अधिकमा १३ सय रुपैयाँ हुने खसीको मासुको मूल्य यो वर्ष पनि सोही आधारमा न्यूनतम मूल्य निर्धारण हुने अध्यक्षले बताए ।
अहिले नै केही व्यवसायीहरूले १ हजार ४ सयदेखि १ हजार ४५० रुपैयाँ किलोसम्म खसीको मासुको मूल्य तोकेको भन्दै उनले खसीको मासुको मूल्यमा यो वर्ष उतार चढाव हुने बताए ।
‘बजारमा जिउँदो खसीको मूल्य तराईको खसीको ७ सय रुपैयाँ छ, लोकल खसीको त्यो भन्दा कम छ । तर तयारी मासुको मूल्य दोब्बर हाराहारी हुने देखियो,’ उनले भने, ‘अब सहुलियतमा ल्याउने खसीले मात्रै मूल्यलाई केही नियन्त्रण गर्न सक्छ ।’
सङ्घका अनुसार यो वर्ष बङ्गुर र बफ मासुको मूल्य प्रतिकिलो ५ सय रुपैयाँमा स्थिर छ । विगत चार वर्षदेखि यी मासुको मूल्यमा उतार चढाव आएको छैन ।
यो दसैँमा कुखुराको मासुको मूल्य भने पहिले भन्दा धेरै हुने सङ्घले जनाएको छ । अहिले प्रतिकिलो ४५० रुपियाँसम्ममा कुखुराको मासु बिक्री भएको र यो मूल्य गत वर्ष भन्दा किलोमा एक सय रुपैयाँले महँगो भएको उनले बताए ।
तर, दसैँको मुखैमा खुद्रा बजारको खपत घट्ने भएकाले मूल्य अझै ओरालो लाग्ने सङ्घको अनुमान छ । काठमाडौँमा अहिले सङ्घका दर्ता भएका एक हजार हाराहारी मासु पसल छन् ।
दसैँमा काठमाडौँमा ८० हजारदेखि एक लाख गोटा खसी–बोका चाहिने सङ्घको अनुमान छ । अहिले दैनिक एक हजार
गोटा खसी–बोका चाहिने सङ्घको अनुमान छ । अहिले दैनिक एक हजार खसी–बोका, ४ सय बङ्गुर र ८ सय गोटा बफ बजारमा मासुका लागि खपत हुने गरेको छ । यस्तै २ लाख किलो भन्दा बढी कुखुराको मासु उपत्यकामा खपत हुन्छ ।
