ABC (क्राईमबिट)
बाँके । संविधान दिवसको अवसरमा नेपालगन्ज कारागारका १७ जना कैदीले बाँकी सजाय छुट पाएका छन् । उनीहरु सोमबार संविधान दिवसको अवसरमा रिहा भएको नेपालगन्ज कारागार प्रशासनले जनाएको छ । दिवसको अवसरमा बाँकी कैद सजाय छुट पाउनेहरुमा सबैजना पुरुषहरु रहेको नेपालगन्ज कारागारका प्रमुख अर्जुनबम शाहले जानकारी दिए ।
‘नेपालगन्ज कारागारमा महिला कैदी हुनुहुन्न’ उनले भने, ‘दिवसको अवसरमा बाँकी कैद छुट पाउनेमा सबैजना पुरुष कैदी हुनुहुन्छ ।’ नेपालगन्ज कारागारले १८ जनाको नाम सिफारिस गरेपनि १७ जनाले मात्र दिवसको अवसरमा बाँकी कैद छुट पाएका हुन् । बाँकी कैद छुट पाएर रिहा हुनेहरुमा सवारी ज्यान मुद्दाका ६ जना, डाँका चोरी मुद्दाका ४ जना, ज्यान मार्ने उद्योग मुद्दाका ३ जना, बहुविवाह र कर्तव्य ज्यान मुद्दाका २/२ जना गरेर १७ जना रहेको शाहले बताए ।
उनीहरुलाई कारागारका कर्मचारी, सुरक्षाकर्मी र कैदीबन्दीहरुले टीका लगाइदिएर बिदाइ गरेका थिए । नेपालगन्ज कारागारमा अब सोमबारसम्म ७ सय ९० जना कैदी र थुनुवाहरु रहेको बताइएको छ । संविधानको धारा २७६ को फौजदारी कसुर ऐन, २०७४ तथा फौजदारी कसुर नियमावली, २०७६ मा मन्त्रिपरिषद्को सिफारिसमा राष्ट्रपतिले कैदी–बन्दीको कैद मिनाहा गर्न सक्ने व्यवस्था छ ।
यही व्यवस्थाअनुसार राष्ट्रपति भण्डारीले विगत वर्षहरूमा जस्तै देशका विभिन्न कारागारमा रहेका ६८१ को कैद कट्टा गरेकी हुन् । संविधान दिवसको अवसर पारेर कैद कट्टाका लागि मन्त्रिपरिषद बैठकले राष्ट्रपतिसमक्ष सिफारिस गरेको थियो ।
