(ABC-Sanchar)
काठमाडौँ । सामाजिक सञ्जाल ट्विटरले आफ्ना ७ हजार ५ सय कर्मचारी मध्ये आधालाई हटाएको छ। कम्पनीले शुक्रवार ५० प्रतिशत कर्मचारी कटौती गरेको एएफपीले जनाएको हो ।
मस्कले लागत घटाउनको लागि ट्विटर इंकमा आधा कार्यदल कटौती गर्ने बताउँदै आएका थिए। उनले कम्पनीले चार मिलियन डलर गुमाएकोले कर्मचारी कटौतीको विकल्प नरहेको बताएका छन्।
‘ट्विटरमा काम गर्ने मेरो समय सकिएको खबर सुनेर उठेँ। म दुखी छु। म अन्योलमा छु’, अमेरिका र क्यानडाका लागि ट्विटरका सार्वजनिक नीति निर्देशक मिशेल अस्टिनले भने।
यसअघि ट्विटरका सिइओ मस्कले आफ्ना अन्य कम्पनीका कर्मचारीहरूलाई सामाजिक सञ्जाल काम गर्न अख्तियार प्रदान गरेको विवरण सार्वजनिक भएको थियो। यसमा टेस्लाका ५० कर्मचारीहरू समावेश छन्।
मस्कले गत अक्टोबर २८ मा ट्विटरको ४४ अर्ब डलरमा ट्विटरको स्वामित्व लिएका थिए। उनले अव ट्विटरमा ब्लु टिक प्राप्त प्रयोगकर्ताले मासिक ८ डलर तिर्नुपर्ने घोषणा गरेका छन्। एजेन्सी
