सर्लाही । निर्वाचन क्षेत्र नं. ४ अन्तर्गत बसबरिया गाउँपालिका–३ भवानीपुरस्थित श्री जनता माध्यमिक विद्यालय मतदान केन्द्रमा मतदान सुरु भएको केही समयमै विवाद भएको छ। मतदान केन्द्रमा जम्मा भएका मतदाताबीच भनाभन र धक्का–मुक्का भएपछि स्थिति तनावपूर्ण बनेको थियो। विवादका कारण केहीबेर मतदान प्रक्रिया अवरुद्ध हुन पुगेको थियो ।
उक्त घटनासम्बन्धी भिडियो सामाजिक सञ्जाल फेसबुकमा सार्वजनिक भएको छ। मतदान अधिकृतले सुरक्षा संवेदन शीलतालाई ध्यानमा राख्दै केही समयका लागि मतदान स्थगित गरेका थिए। उत्पन्न भएको विवाद घटनास्थलमा खटिएका सुरक्षाकर्मी र निर्वाचन टोलीको सक्रियता तथा राजनीतिक दलका प्रतिनिधिहरूबीच भएको सहमतिका आधारमा अहिले विवाद साम्य भएको छ।
