चितवन । भरतपुरमा विद्युतीय कार (ईभी) मा एक्कासी आगलागी हुँदा एक जनाको मृत्यु भएको छ।
जिल्ला प्रहरी कार्यालय चितवनका अनुसार भरतपुर महानगरपालिका-१०, चौबिसकोठी स्थित भित्री सडकमा रोकिराखेको अवस्थामा रहेको बा.प्र.०१-०३१ च …. नम्बरको ईभी कारमा आज दिउँसो अचानक आगलागी भएको थियो।
आगलागीमा परी कारभित्र रहेका भरतपुर-११ बस्ने अन्दाजी ३५ वर्षीय एक पुरुषको घटनास्थलमै मृत्यु भएको प्रहरीले जनाएको छ। मृतकको पहिचान खुल्न बाँकी छ।
आगलागीको कारण विद्युत सर्ट भएर भएको हुन सक्ने प्रारम्भिक अनुमान गरिएको छ। प्रहरी र स्थानीयको सहयोगमा दमकलले आगो नियन्त्रणमा लिएको थियो।
शव परीक्षणका लागि भरतपुर अस्पताल पठाइएको र घटनाको सम्बन्धमा थप अनुसन्धान भइरहेको प्रहरीले जनाएको छ।
