बाँके । दशैं पर्व मनाउन भारतका विभिन्न स्थानबाट स्वदेश फर्कनेहरुको चापले बाँकेको मुख्य नाका नेपालगञ्ज जमुनाहामा अत्याधिक भीडभाड बढेको छ।
भारतको दिल्ली, मुम्बई, पञ्जाब, हरियाणा, बेंगलोर लगायतका सहरबाट हजारौं नेपाली चाडपर्व मनाउन घर फर्किरहेका छन्। बिहानैदेखि नाकामा यात्रुहरुको लामो लाम लागेको छ।
नाकामा नेपाल आउनेहरुको मात्र नभई नेपालबाट भारततर्फ जानेहरुको पनि उत्तिकै भीड छ। आवतजावत बढेसँगै चेकजाँचमा खटिएका सुरक्षाकर्मीलाई समेत व्यवस्थापनमा हम्मेहम्मे परेको छ।
चाडपर्वको बेला हुने यस्तो भीडलाई लक्षित गर्दै सुरक्षा चेकजाँच थप कडा पारिएको प्रहरीले जनाएको छ। एबीसी सञ्चारको भण्डाफोर टिमले स्थलगत रुपमा पुग्दा यात्रुहरु घण्टौसम्म लाइनमा बस्नुपरेको दृश्य देखिएको थियो।
