सिन्धुलीमा सुमो दुर्घटना तीन महिलाको मृत्यु, तीन बेपत्ता र चार घाइते
सिन्धुली – काठमाडौंबाट खोटाङतर्फ जाँदै गरेको यात्रुवाहक टाटा सुमो सुनकोशी नदीमा खस्दा तीन महिलाको मृत्यु भएको छ।
सिन्धुलीको फिक्कल गाउँपालिका-६ नागथानस्थित मध्यपहाडी लोकमार्गमा आज बिहान करिब २:३० बजे को १ ज २९७६ नम्बरको सुमो करिब २०० मिटर तल सुनकोशी नदीमा खसेको हो।
जिल्ला प्रहरी कार्यालय सिन्धुलीका डीएसपी बिजय श्रेष्ठका अनुसार घटनास्थलमा तीन महिलाको शव फेला परेको छ। मृतकको पहिचान खुल्न बाँकी छ।
दुर्घटनामा चालकसहित चार जना घाइते भएका छन्। घाइते हुनेमा ओखलढुंगा निवासी २९ वर्षीय चालक आशिष विष्ट, खोटाङ दिक्तेल नगरपालिका-३ की ३८ वर्षीया सम्झना राई, उनकी १२ वर्षीया छोरी सिवानी राई र दिक्तेल-१ का १३ वर्षीय अंकित विक रहेका छन्। उनीहरुलाई उद्धार गरी उदयपुरको घुर्मीस्थित जनसेवा हेल्थ सेन्टरमा उपचारका लागि पठाइएको छ। चालक बेहोस अवस्थामा छन् भने सम्झना राईको अवस्था गम्भीर छ।
चालकको भनाइ अनुसार सुमोमा १० जना सवार थिए। दुर्घटनापछि तीन जना अझै सुनकोशीमा बेपत्ता छन्। बेपत्ताको खोजीका लागि इलाका प्रहरी कार्यालय खुर्कोटबाट प्रहरी निरीक्षकको नेतृत्वमा टोली परिचालन गरिएको छ। स्थानीयसहित प्रहरीले खोजी तथा उद्धार कार्य जारी राखेको छ।
