ABC (क्राईमबिट)
सिरहा । प्रहरीले लहानस्थित मालपोत कार्यालयमा विस्फोट गराउने दुई जना मुख्य आरोपीलाई पक्राउ गरेको छ ।
प्रदेश नम्बर २ प्रहरी कार्यालयका अनुसार सिरहा सुखिपुर नगरपालिका ५ का रामरिझन यादव र लक्ष्मीपुर पतारी गाउँपालिका ३ का २६ वर्षीय अभिमन्यू गिरी पक्राउ परेका हुन् ।
उनीहरूलाई प्रदेश प्रहरी कार्यालय र सिरहा प्रहरीको विशेष टोलीले सोमबार सुखिपुर नगरपालिका(५ बाट पक्राउ गरेको हो ।
प्रदेश प्रहरी प्रमुख प्रहरी नायब महानिरीक्षक धीरजप्रताप सिंहका अनुसार उनीहरूले घटना गराएको स्वीकार गरेका छन् ।
उक्त विस्फोटको जिम्मा जनतान्त्रिक तराई मुक्ति मोर्चाका गोइत समूहका अध्यक्ष जयकृष्ण गोइतको निर्देशनमा भएको सिंहले बताए । विस्फोटमा आठ जना घाइते भएका थिए ।
‘उक्त प्रेसर कुकर बम जयकृष्ण गोइतले सिरहा सुखिपुर(८ का रामकुमार यादवलाई दिएको र यादवले आफूहरूलाई विस्फोट गराउन हस्तान्तरण गरेको आरोपीले स्वीकार गरेको सिंहले बताए ।
चैत १ गते मध्याह्न मालपोत कार्यालयमा प्रेसर कुकर बम विस्फोट गराइएको थियो । सेवाग्राहीहरूको अत्यधिक चाप भएका बखत बम विस्फोट हुँदा आठ जना घाइते भएका थिए ।
पक्राउ परेकामध्ये गिरी विगत पाँच वर्षदेखि जनतान्त्रिक तराई मुक्ति मोर्चा गोइत समूहमा संलग्न रहेको पत्ता लागेको छ ।
