(केभी निस्चल)
दाङ । ट्राफिक प्रहरी कार्यालय तुलसीपुरले अटो व्यवस्थापनको काम सुरु गरेको छ । मंगलबारदेखि तुलसीपुरको नयाँ बसपार्क क्षेत्रबाट अटो व्यवस्थापनको लागि मार्किङको काम सुरु गरिएको हो ।
ट्राफिक प्रहरी कार्यालय तुलसीपुरका प्रमुख उत्तमकुमार जिसीका अनुसार बसपार्क क्षेत्रमा अस्तब्यस्त पार्किङलाई मार्किङ गरि व्यवस्थित गर्ने कामको सुरु गरिएको हो ।
तुलसीपुर बसपार्क क्षेत्रमा अटो पार्किङका लागि निश्चित क्षेत्र निर्धारण गर्न मार्किङको काम सुरु गरेको र बजार क्षेत्रका अटो पार्किङका लागि मार्किङ सुरु हुने जिसीले बताए । बस पार्कमा अटोका लागि पार्किङ स्थल निर्धारण गरि सकेपछि तुलसीपुरको ‘क’ लाइन ‘ग’, लाइन सल्यानरोड, राप्ती प्रादेशिक अस्पताल क्षेत्रलगायतका स्थानमा मार्किङको काम गरिने उनको भनाई छ । मार्किङका लागि तुलसीपुर उपमहानगरपालिकाले एक लाख बराबरको रङ उपलब्ध गराएको छ ।
