ABC (क्राईमबिट)
काठमाडौँ । बाजुराको त्रिवेणी नगरपालिका वडा नम्बर-७ मा प्रतिनिधिसभा र प्रदेशसभा निर्वाचन चलिरहँदा प्रहरी र स्थानीयको बिचमा झडप भयो । मङ्सिर ४ मा त्रिवेणी–७ स्थित नाटेश्वरी मतदान केन्द्रमा साँझ पौने ५ बजेतिर झडपको क्रममा एक जना युवकले प्रहरीको इन्सास राइफल खोसेर भागे । अनि, प्रहरीले चलाएको गोली लागेर २६ वर्षीय सन्दीप ऐडीको घटनास्थलमा मृत्यु भयो ।
सन्दीपको शव अझै घटनास्थलमा छ । मृतक वडा नम्बर-९ स्थित रत्नावती माविमा कार्यरत शिक्षक मानबहादुर ऐडीका छोरा हुन् । उनी वडा नम्बर-७ का स्थानीय हुन् । झडप गर्नेहरूले खोसेर लगेको प्रहरीको राइफल भेटिएको छ । घटनास्थल नजिकै फालेको अवस्थामा राइफल भेटिएको बाजुराका प्रमुख जिल्ला अधिकारी प्रकाशचन्द्र अधिकारीले बताए ।
नाटेश्वरी मतदान केन्द्रमा झडप हुँदा ३ जना स्थानीय र प्रहरी सहायक हवल्दार कृष्ण बहादुर कुँवर घाइते भए । तर, सो घटना भएको केही समयपछि त्यहाँ फेरी अर्को दर्दनाक घटना भयो । १५-२० जनाको समूहले मतदान स्थलमा नेकपा (एमाले)को प्रतिनिधि भएर खटिएका चेतन ऐडीलाई लखेटेर कुट्न थाले ।
अनेरास्ववियुका सचिवालय सदस्य समेत रहेका चेतनलाई मरणासन्न हुने गरी कुटेपछि सो समूहले मतदान केन्द्रभन्दा पर जंगलछेउमा लगेर छाडेको बताउँछन्, एमालेका नेताहरूको भनाई छ ।
लखेट्दै कुटेर जंगलछेउमा छाडिएका चेतनलाई विद्यार्थी सङ्गठनमा कार्यरत सुजाता ऐडीले घरसम्म लगेको बताइएको छ । छिमेकीको घरमा ताला लगाएर लुकाएपनि काँग्रेसका कार्यकर्ताले थुतेर निर्घात कुटपिट गरेको एमाले नेताहरूको भनाई छ । राति १० बजेतिर सेनाले गाडीले उनलाई अछामस्थित बयलपाटा अस्पतालमा लगेर छाड्यो । त्यही राति उनको मृत्यु भयो ।
बाजुरामा प्रतिनिधिसभातर्फ एमालेका कर्ण थापासँग नेपाली काँग्रेसका बद्री पाण्डे प्रतिस्पर्धामा छन् ।
