ABC (क्राईमबिट)
कपिलवस्तु । कृष्णनगर नगरपालिका वडा नम्बर १२ वडा अध्यक्ष प्रहलाद प्रसाद यादवले युवातीलाई भारतमा बेपत्ता पारेको आरोप लागेको हो । कृष्णनगर १२ भगवानपुर बस्ने मोहम्मद रइसले छोरीलाई बेचबिखन मनसायले भारतमा बेपत्ता पारिएको भन्दै इलाका प्रहरी कार्यालय कृष्णनगरमा निदेवन दिएका छन् । गत बैशाख २९ प्रहरीमा निवेदन परेको हो । गत बैशाख २४ गते यो घटना घटेको जनाइएको छ ।
वडा अध्यक्षको संरक्षणमा ज्ञानशिला कोरी, मोहम्मद रफिक खाँ र अमिरल्ला खाँले विभिन्न लोभ, प्रलोभनमा पारि भारतमा बेचबिखन गरेको आरोप लागेको छ ।
ज्ञानशिला कोरीले छोरीलाई ललाईफकाई भारतको बैरिहवा बस्ने अलि हसन कुजडासँग सम्पर्क गराएको निवेदनमा उल्लेख गरिएको छ । भगवानपुरमा एक आँपको बगैचाको ठेक्का लिई काम गर्दै आएका कुजडाले छोरीलाई भारतमा लगेको निवेदक मोहम्मद रइसले बताए । निवेदक मोहम्मद रइसले छोरीलाई अनैतिक धन्धामा लगाउनुको साथै ज्यानसमेत खतरा रहेकोले कसुरदारहरुलाई पक्राउ गरि छोरीलाई उपस्थित गराई कारवाहीको माग गरेको बताए ।
स्थानीयले आरोपी अलि हसन कुजरासँग लामो समयदेखि माया बसेको बताउँछन् । उनी सहमतिमा कुजडासँग मोहम्मद रइसको छोरी भारतमा भागेर गएको स्थानीयले जनाएका छन् । बेपत्ता किशोरीको भारत सिमा नजिकै बेलभरिया गाउँमा उनको बिहेसमेत भएको स्रोतले जानकारी दिएको छ । कुजडासँग माया बसेपछि आफ्नो घरमा बस्न नमानेको स्रोतको भनाइ । उनी अहिले माइती घरमै रहेको बताइएको छ ।
यता इलाका प्रहरी कार्यालय कृष्णनगरका प्रहरी निरीक्षक नवराज ढुङ्गानाले छोरीलाई बेपत्ता पारिएको भन्ने विषयमा खोज अनुसन्धान भइरहेको बताए । उनले पति–पत्नी बीच मनमुटाव भएपछि पत्नी पतिसँग बस्न नमानेको बताए । प्रहरी निरीक्षक ढुंगानाले बेचबिखनको घटना नभएको बताउँदै आपसी पारिवारिक विवादित विषय भएको दावी गरे ।
