ABC (क्राईमबिट)
विराटनगर । २८ वर्षीय रोहित चौधरीको हत्या आरोपमा पक्राउ परेका दुई जनालाई बुधबार प्रहरीले सार्वजानिक गरेको छ । पक्राउ परेका मोरङको लेटाङ नगरपालिका–१ का ३५ वर्षीय पर्वत भन्ने दिपक तिमिल्सिना र धरान उपमहानगरपालिका–१४ का ३४ वर्षीय अनसन तामाङ हुन् ।
उनीहरूलाई कोशी प्रदेश प्रहरी कार्यालय विराटनगरले बुधबार पत्रकार सम्मेलन गरी सार्वजनिक गरेको हो । प्रहरीका अनुसार पक्राउ परेकामध्ये दिपक घटनाका मुख्य अभियुक्त हुन् । उनैले रोहितलाई सुनसरीको धरान–इटहरी सडकखण्डस्थित सेउती पुलनजिकै साउन ५ गते गोली हानेका थिए ।
कोशी प्रदेश प्रहरी कार्यालय विराटनगरका डिआइजी राजेशनाथ बास्तोलाका अनुसार रोहितमाथि लुटपाट गर्नेक्रममा होहल्ला भएप्छि लुटेरा समूहका दिपकले गोली प्रहार गरेको अनुसन्धानबाट खुलेको छ ।
खुकुरी गर्धनमा र पेस्तोल छातीमा देखाएर रोहितसँग गएकी किशोरीको तीन आनाको सुनको सिक्री, मोबाइल र लेडिज झोला लुटेको र त्यसपछि रोहितले होहल्ला गर्दै प्रतिकार गर्न खोजेपछि गोली चलाएको देखिएको घटनाको अनुसन्धानमा खटेका संघीय प्रहरी कार्यालय धरानका एसपी भीम दाहालले बताए ।
उनले भने, ‘रोहित र किशोरी सेउती पुलको जंगल छिरेको १० मिनेट भित्रमा लुटपाट गरी गोली हानेर लुटेरा समूह पानमारा जाने जंगलतिर भागेको देखिएको छ ।’ रोहित हत्याको मुख्य कारण लुटपाट रहेको अनुसन्धानबाट खुलेको उनले बताए ।
उनले भने, ‘हामीले सबै कोणबाट सुक्ष्म तरिकाले अनुसन्धान गरेका थियौँ । हत्या गरिनुको कारण लुटपाट नै रहेको देखियो ।
डिआईजी बास्तोलाका अनुसार लुटपाट गरी हत्या गर्ने समूहमा तीन जना रहेको खुलेको छ । जसमध्ये दुई जना पक्राउ परेका छन् भने एक जना अझै फरार छन् ।
प्रहरीका अनुसार पक्राउ परेका दिपक यसअघि पनि विभिन्न अपराधमा कैद भुक्तान गरी छुटेका अभियुक्त हुन् । दिपक जबरजस्ती करणी मुद्दामा १० वर्ष कैद भुक्तान गरी दुई महिना अगाडि छुटेका थिए । यस्तै, तामाङ लागूऔषध मुद्दामा ६ महिना कैद भुक्तान गरी २ वर्ष अगाडि छुटेका थिए । साथै, यसअघि पनि उनीहरू चार वटा लुटपाटको घटनामा संलग्न भएको अनुसन्धानबाट खुलेको छ ।
