उदयपुर । प्रतिनिधिसभा निर्वाचन २०८२ को मतदान सुरु भएको केही समयमै प्रहरीको हतियारबाट गोली पड्किँदा मतपेटिकामा सामान्य क्षति पुगेको छ। कटारी नगरपालिका–३ स्थित तरकारी तथा फलफूल केन्द्र तावाखोला (ख) मतदान केन्द्रमा बिहान ७:१० बजेतिर प्रहरीले बोकेको सटगनबाट गोली पड्किएको थियो। गोली पड्किएर क्षति पुगेको मतपेटिका फेरेर मतदानलाई सुचारु राखिएको छ। मतदानमा अन्य कुनै अवरोध नभएको प्रहरीले जनाएको छ ।
प्रहरी प्रमुख डीआईजी विनोद घिमिरेले गोली लागेर मतपेटिका क्षतिग्रस्त भए पनि अन्य भौतिक वा मानवीय क्षति नभएको जानकारी दिएका छन्। प्रहरीले यो घटनालाई ‘दुर्घटना’ को रूपमा लिएको छ र मानवीय त्रुटिका कारण गोली चलेको हुन सक्ने प्रारम्भिक अनुमान गरेको छ ।
