दाङ । घोराही उपमहानगरपालिका-१४ स्थित न्यू मनकामना गेष्ट हाउसमा लागुऔषध कारोबार भइरहेको गोप्य सूचनाका आधारमा खटिएको प्रहरी टोलीले चार जनालाई पक्राउ गरेको जिल्ला प्रहरी कार्यालय दाङले जनाएको छ ।
पक्राउ पर्नेहरूमा रोल्पा त्रिवेणी गाउँपालिका-२ नुवागाउँ घर भई हाल घोराही-१४ सरस्वती टोल बस्ने ३१ वर्षीय हिरामणी घर्ती, रोल्पा माडी गाउँपालिका-७ मिसिडाँडा घर भई हाल घोराही-१५ रतनपुर बस्ने २६ वर्षीय ईश्वर बुढा मगर, घोराही-१४ नवजलजला टोल बस्ने २६ वर्षीय बिनय डाँगी र रोल्पा त्रिवेणी गाउँपालिका-२ नुवागाउँका २४ वर्षीय धोजबहादुर घर्ती रहेका छन्।
प्रहरीले उनीहरूको साथबाट साना-साना पुडियामा राखिएको १७५ पुडिया लागुऔषध (ब्राउन सुगर) जस्तो देखिने पदार्थ बरामद गरेको जनाएको छ। बरामद पदार्थको शुद्ध तौल ६० ग्राम ३२० मिलिग्राम रहेको प्रहरीले जनाएको छ। साथै उनीहरूको साथबाट विभिन्न दरका नेपाली रुपैयाँ ३५ हजार ८ सय ३५ रुपैयाँ पनि बरामद गरिएको छ।
उनीहरूलाई नियन्त्रणमा लिएर लागुऔषध सम्बन्धी कसूरमा दाङ जिल्ला अदालत घोराहीबाट १० दिनको म्याद थप अनुमति लिएर अनुसन्धान भइरहेको जिल्ला प्रहरी कार्यालय दाङले जनाएको छ।
