सुर्खेत । जिल्ला प्रहरी कार्यालय सुर्खेतले घटनाको गम्भीरता लाई मध्यनजर गर्दै बुधबार सीआईबी सँग सहयोग मागेको थियो। सोही अनुसार प्रहरी निरीक्षकको नेतृत्वमा सीआईबीको विज्ञ टोली शुक्रबार सम्म वीरेन्द्रनगर आइपुगेको जिल्ला प्रहरी कार्यालय सुर्खेतका प्रवक्ता तथा डीएसपी मोञ्जुङ बुढाथापा ले जानकारी दिए।
उनका अनुसार जिल्लास्तर बाट पहिलो चरणको अनुसन्धान पूरा भइसकेको छ।
“घटनाको गम्भीरता लाई ध्यानमा राख्दै थप अनुसन्धानका लागि सीआईबीको सहयोग लिइएको हो ” डीएसपी बुढाथापाले बताए।
प्रहरीका अनुसार घटनासँग सम्बन्धित नमुनाहरू केन्द्रीय फरेन्सिक विज्ञान प्रयोगशाला मा टक्सिकोलोजिकल र बायोसेरोलोजिकल परीक्षणका लागि पठाइएको छ। उक्त रिपोर्ट प्राप्त भएपछि पोस्टमार्टम रिपोर्ट सँग तुलना गरेर घटनाको अन्तिम निष्कर्ष निकालिने बताइएको छ।
पोस्टमार्टम रिपोर्टअनुसार जबरजस्ती करणीका क्रममा पीडितको संवेदनशील अंग च्यातिएको र अत्यधिक रक्तस्रावका कारण मृत्यु भएको उल्लेख गरिएको छ। शव परीक्षणका लागि भेरी अस्पतालका फरेन्सिक विशेषज्ञ डाक्टर अर्बिन शाक्य को नेतृत्वमा रहेको टोली कर्णाली प्रदेश अस्पताल सुर्खेत पुगेको थियो।
प्रहरीका अनुसार घटना जनजागरण सामुदायिक वन क्षेत्रमा फागुन २३ गते बिहान भएको हो। गुर्भाकोट–६ बडाखोली की इनिसा विकको सामूहिक बलात्कारपछि हत्या भएको भन्दै आफन्तले फागुन २५ गते प्रहरीमा उजुरी दिएका थिए।
यस घटनामा संलग्न रहेको आरोपमा प्रहरीले चार जनालाई पक्राउ गरेको छ।
