दाङ । तुलसीपुरमा वैदेशिक रोजगारीमा पठाइदिन लिएको रकम ठगी गरेको भन्दै एक जनालाई जुत्ताको माला लगाएर बजार घुमाएको आरोपमा एक व्यक्ति पक्राउ परेका छन् ।
पक्राउ पर्नेमा तुलसीपुर उपमहानगरपालिका–९ थर्पुडाँडा निवासी ३५ वर्षीय पर्साराम विक रहेको जिल्ला प्रहरी कार्यालय दाङका प्रवक्ता डीएसपी रेशम बोहराले बताए । विकले तुलसीपुर–६ बरुवागाउँ निवासी ३६ वर्षीय शेरबहादुर वलीलाई बुधबार दिउँसो केही भागमा कपाल खौरिएर जुत्ताको माला लगाई घाँटीमा डोरीले बाँधी लात्तीले हान्दै तुलसीपुर बजार घुमाएको उनले जानकारी दिए ।
वलीले विदेश पठाइदिने भन्दै लिएको रकम ठगी गरेको भन्दै विकले यस्तो अभद्र व्यवहार गरेको डीएसपी बोहराले बताए । विकलाई बुधबार नै तुलसीपुरबाट पक्राउ गरी अपमानजनक या अमानवीय व्यवहार गर्न नहुने मुद्दामा जिल्ला अदालतबाट पाँच दिनको म्याद थप गरी अनुसन्धान गरिरहेको दाङ प्रहरीले जानकारी दिएको छ ।
