कपिलवस्तु । महाराजगन्ज बर्गदवा क्षेत्रमा अनिश्चितकालीन निषेधाज्ञाबिच स्थानीय युवाहरूले हुलाकी मार्गमा टायर बालेर प्रदर्शन गरेपछि प्रहरीले हस्तक्षेप गर्दा झडप भएको छ ।
कपिलवस्तुमा स्थिति नियन्त्रणमा लिन प्रहरीले हवाई फायर गर्दा ४ जना घाइते,अहिले कर्फ्यु जारी,
जिल्ला प्रहरी कार्यालय कपिलवस्तुका एसपी सन्तोष आचार्यले दिएको जानकारी अनुसार युवाहरूले प्रहरीलाई अवरोध गर्ने क्रममा झडप भएपछि हवाई फायर गर्नुपरेको हो । हवाई फायरबाट तीन जना घाइते भएका छन् । उनले अहिले स्थिति नियन्त्रणमा आउँदै गरेको र घाइतेहरूलाई उपचारका लागि बुटवल र भैरहवा पठाइएको बताए ।
शनिबार मन्दिरमा भजन गाउँदा तोडफोड भएको विषयलाई लिएर दुई समुदायबिच तनाव सिर्जना भएपछि जिल्ला प्रशासन कार्यालयले उक्त क्षेत्रमा अनिश्चितकालीन निषेधाज्ञा जारी गरेको थियो ।
सम्भावित झडप रोक्न जिल्ला प्रशासन कार्यालयले एक सूचना प्रकाशित गर्दै स्थानीय प्रशासन ऐन २०२८ को दफा ६ (३) बमोजिम आज दिउँसो २ बजेदेखि अर्को सूचना जारी नभएसम्म भेला, सभा, जुलुसलगायत गतिविधि गर्न नपाइने गरी निषेधाज्ञा जारी गरेको थियो ।
आदेशको उल्लङ्घन गर्नेलाई नियन्त्रणमा लिई कानुनबमोजिम कारबाही गरिने प्रशासनले जनाएको छ । निषेधाज्ञा पूर्वमा बर्गदी पुल, पश्चिममा बहादुरगञ्ज चोक, उत्तरमा महाराजगन्ज बजार र दक्षिणमा हर्दौनासम्म लागु गरिएको छ ।
