दाङ । भालुवाङ पुल्चोकस्थित सेवा प्रदायक संस्था लालमटिया स्वास्थ्य चौकी भवनबाट औपचारिक सेवा शुभारम्भका लागि शनिबार बिहानैदेखि सरसफाइ कार्यक्रम सम्पन्न गरिएको छ । स्थानीय नयाँबजार टोल विकास संस्थाले आयोजना गरेको सरसफाइ कार्यक्रममा टोलका सम्पूर्ण बासिन्दाहरुको उत्साहजनक रूपमा सहभागिता रहेकोे थियो ।
टोल विकास संस्थाकि अध्यक्ष भूमि गुरुङका अनुसार यही आगामी असोज महिनाको पहिलो दिनदेखि औपचारिक रूपमा स्वास्थ्य सेवा सुचारु हुने कुरा जानकारी छ । यद्यपि अनौपचारिक रूपमा सेवा भने अस्तिनै देखि शुरु भइसकेको अध्यक्ष गुरुङको भनाइ छ । भवन चिरिच्याँट्ट पारेर आकर्षक रूपमा बनाइएको छ ।
टोलका अध्यक्ष गुरुङका आव्हानमा आआफ्ना हातमा हँसिया, कोदालो, फरुवा जस्ता साधन लिएर एकाबिहानैदेखि टोलबासीहरु सरसफाइमा सहभागी भए । यसरी आफ्नै घर आँगनमा स्वास्थ्य चौकी सुविधा आएकोमा स्थानीय महिला निर्मला रोकाको अनुहारमा उत्तिकै खुशी झल्किएको छ । सहभागीहरु सबैमा उत्तिकै आशा उत्साह देखिन्छ ।
चौबीसै घण्टा सुत्केरी सेवा सहितकाे स्वास्थ्य चौकीको यो भवनबाट उचित सेवा प्राप्त गर्ने कुरामा आफूहरु विश्वस्त रहेको स्थानीय समाजसेवी महिला हुमादेवी मास्केको धारणा बुझिन्छ । कुनै समय : गाईबाख्रा चराउने रातो माटोको थुम्को – डाँडो अर्थात रातोडाँडा नामले चिनिने यो ठाउँ २०६० सालदेखि विस्थापित बस्तीमा परिणत भएको थियो ।
स्थानीय सरकारले गरेको पहलमा उक्त स्वास्थ्य चौकी भवन निर्माण भएर स्वास्थ्य सेवा पाउनेमा सफाइ कार्यक्रममा आएका स्थानीयबासी युवा व्यवसायी मोहन आचार्य विश्वस्त देखिन्छन् । सरकारले नागरिकका गरेको यो पहलका लागि आचार्यले खुलेर प्रशंसा गरे । भालुवाङ सहित आसपासका गाउँका मानिसहरुले यहाँबाट उचित स्वास्थ्य लाभ प्राप्त गर्ने विश्वास गरिएको छ ।
