दाङ । घोराही पाँच वर्षीय विशेष अभियान लिएर नेपालको सबै पालिका पैदल यात्रामार्फत पुग्ने लक्ष्यसहित यात्रामा निस्किएका मदन केसी महानलाई घोराहीमा विशेष स्वागत गरिएको छ।
देशका विभिन्न पालिकामा पुगेर नागरिकसँग प्रत्यक्ष संवाद गर्ने, स्थानीय समस्या, सम्भावना र आवश्यकतालाई नजिकबाट बुझ्ने तथा सकारात्मक सन्देश प्रवाह गर्ने उद्देश्यसहित पैदल यात्रामा निस्किएका महान घोराही आइपुगेका हुन्।
उहाँलाई घोराही बनाऔँ अभियानका तर्फबाट टीका तथा खादा लगाएर स्वागत गरिएको थियो। लामो पैदल यात्राका क्रममा आवश्यक पर्ने जुत्ता अभियानका तर्फबाट उपहारस्वरूप प्रदान गर्दै महानको यात्रालाई थप उत्साह र प्रोत्साहन गरिएको हो।
नेपाल पत्रकार महासंघका केन्द्रीय सचिव एवं घोराही बनाऔँ अभियानका संयोजक सविन प्रियासनले महानलाई स्वागत गर्दै उहाँको अभियानको सफलताको शुभकामना व्यक्त गर्नुभयो। लामो समयसम्म पैदल यात्रा गर्दै देशका सबै पालिकामा पुग्ने लक्ष्य आफैँमा साहसिक, चुनौतीपूर्ण र प्रेरणादायी रहेको उहाँले बताउनुभयो।
“देशलाई नजिकबाट बुझ्न, नागरिकका कुरा सुन्न र स्थानीय तहका सम्भावना तथा समस्यालाई प्रत्यक्ष रूपमा अनुभूति गर्न पैदल यात्रा प्रभावकारी माध्यम हो,” प्रियासनले भन्नुभयो, “मदन केसी महानको पाँच वर्षीय अभियानले नेपालको भूगोल, समुदाय, संस्कृति र नागरिकबीचको सम्बन्धलाई अझ नजिकबाट जोड्ने विश्वास लिएका छौँ।”
स्वागत कार्यक्रममा राप्ती साहित्य परिषद्का केन्द्रीय अध्यक्ष कमलमणि देवकोटा, मेधावी कनसनका सञ्चालक सूर्य विसीलगायतको उपस्थिति थियो। सहभागीहरूले महानको अभियानको प्रशंसा गर्दै यात्राको सफलताको शुभकामना दिएका थिए।
पाँच वर्षसम्म निरन्तर पैदल यात्रा गर्ने लक्ष्य लिएका महानले देशका सबै पालिकामा पुगेर त्यहाँको सामाजिक, आर्थिक, सांस्कृतिक तथा भौगोलिक अवस्थाबारे प्रत्यक्ष जानकारी लिने र स्थानीय नागरिकसँग अन्तरक्रिया गर्ने योजना बनाएका छन्।
यात्राका क्रममा स्थानीय समुदायसँग भेटघाट गर्ने, उनीहरूका अनुभव तथा समस्याहरू सुन्ने र नेपालको विविधता तथा सम्भावनालाई नजिकबाट नियाल्ने उहाँको उद्देश्य रहेको बताइएको छ। लामो दूरीको यस यात्राले नेपालका विभिन्न भूगोल र समुदायबीचको सम्बन्धलाई थप बलियो बनाउन सहयोग पुग्ने अपेक्षा गरिएको छ।
घोराहीमा गरिएको स्वागतले महानको पैदल यात्राप्रति स्थानीय स्तरमा समेत सकारात्मक चासो र समर्थन रहेको देखाएको छ। घोराही बनाऔँ अभियानले सामाजिक तथा सकारात्मक अभियानमा सहकार्य गर्दै आएको उल्लेख गर्दै महानको यात्रालाई पनि प्रोत्साहनस्वरूप स्वागत गरिएको जनाएको छ।
पाँच वर्षसम्म निरन्तर अघि बढ्ने महानको अभियानले नेपालको स्थानीय तहको वास्तविक अवस्था, नागरिकका आवश्यकता र सम्भावनालाई नजिकबाट बुझ्ने अवसर सिर्जना गर्ने विश्वास गरिएको छ।
