काठमाडौं । नेपाल प्रहरीमा तिहार सकिएलगत्तै सरुवा प्रक्रिया अघि बढाउने तयारी भएको छ। प्रहरी प्रधान कार्यालय स्रोतका अनुसार समयावधि पूरा भएका एसएसपी, एसपी, डीएसपी र इन्स्पेक्टरहरूको सरुवा अर्को साताभित्र गर्ने तयारी छ।
सरुवा रोकिँदा कैलाली, बर्दिया र तनहुँलगायत जिल्लाका एसपीको कार्यकाल १५ महिनासम्म पुगेको छ भने दर्जनभन्दा बढी जिल्लाका एसपीले १४ महिना कटाइसकेका छन्।
त्यस्तै, केही डीआईजीको समेत सरुवा हुने सम्भावना छ। लुम्बिनी प्रदेश प्रहरी प्रमुख डीआईजी *भूपेन्द्र खत्री* लाई केन्द्रीय प्रहरी प्रवक्ताको जिम्मेवारी दिने चर्चा छ। उनी भावी प्रहरी महानिरीक्षकका सम्भावित दाबेदारमध्ये एकका रूपमा समेत चर्चामा छन्।
