(सागर थापा)
बाँके । रेडपाण्डाको छाला र भालुको पित्तसहित शनिबार राती ३ जनालाई प्रहरीले पक्राउ गरेको छ । नेपालगन्ज पुष्पलाल चोकमा रहेको राप्ती गेष्ट हाउसमा वन्यजन्तुका अंगको कारोबार भइरहेको भन्ने सूचनाको आधारमा उनीहरुलाई पक्राउ गरिएको जिल्ला प्रहरी कार्यालय बाँकेले पत्रकार सम्मेलन गरेर जानकारी दिएको छ । 
लुम्बिनी प्रदेश प्रहरी कार्यालय दाङको अनुसन्धान ब्युरो RIT र जिल्ला प्रहरी कार्यालय बाँकेबाट खटिएको संयुक्त प्रहरी टोलीले शनिबार राती करिब ९ बजेको समयमा उनीहरुलाई पक्राउ गरेको जिल्ला प्रहरी कार्यालय बाँकेका प्रहरी प्रमुख एसपी श्यामकृष्ण अधिकारीले बताए । नेपालगन्जको राप्ती गेष्ट हाउसमा नियमित चेकजाँच गर्ने क्रममा होटलको १० नम्बर कोठाबाट उनीहरु पक्राउ परेका हुन् ।
पक्राउ पर्नेहरुमा दाङ घोराही ४ का ४९ बर्षिय भक्तबहादुर पुन, ४१ बर्षिय केशव पुन र शान्तीनगर गाउँपालिका–१ का २९ को रोबिन बुढा रहेका छन् । प्रहरीका अनुसार कालो झोलाभित्र सेतो कपडामा रहेको संरक्षित रेडपाण्डा (हाब्रे)को छाला एक थान र चार वटा भालुको पित्तजस्तो देखिने बस्तु बरामद गरेको छ ।
उनीहरुलाई वन ऐन २०७६ को दफा ४९ को (त) को कसुरमा राष्ट्रिय निकुन्ज तथा वन्यजन्तु संरक्षण ऐन २०२९ को दफा २६ (१) बमोजिमको ५ लाखदेखि १० लाखसम्म जरिवाना र ५ वर्षदेखि १५ वर्षसम्म कैद वा दुवै सजाय हुन सक्ने एसपी अधिकारीले जानकारी दिए । पक्राउ परेका ३ जनालाई थप अनुसन्धानका लागि जिल्ला बन कार्यालय बाँकेमा बुझाइएको छ ।
