ABC (क्राईमबिट)
काठमाडौं । भर्खरै जन्मिएको शिशुलाई झाडीमा फालेको भन्दै काठमाडौंको पवित्रानगरबाट प्रहरीले एकजना आमा (युवती)लाई पक्राउ गरेको छ ।
काठमाडौं महानगरपालिकाको वडा नम्बर २६ अन्तर्गत पर्ने पवित्रानगरमा बुधबार बिहान झाडीमा फालिएको अवस्थामा शिशु फेला परेको थियो ।
बुधबार बिहान करिब ३ बजेतिर झाडीमा शिशु कराएको आवाज सुनेपछि पुगेका स्थानीयले भर्खरै जन्मिएको शिशु झाडीमा देखेपछि प्रहरीलाई खबर गरेका थिए ।
प्रहरीले शिशुको उद्दार गरेर उपचारका लागि कान्ति बाल अस्पताल ल्याएको थियो । शिशुलाई उपचारका लागि अस्पताल पुर्याइए पछि प्रहरीले शिशुलाई झाडीमा फाल्ने आमाको खोजी शुरु गरेको थियो ।
खोजीका क्रममा महाराजगञ्ज क्षेत्रमा डेरा गरी बस्ने २० वर्षीया युवती शिशुको आमा भएको खुलेको हो । ती युवती अविवाहित भएकी जनाइएको छ ।
प्रहरीले शिशुकी आमालाई नियन्त्रणमा लिएको छ । नियन्त्रणमा लिइएकी शिशुकी आमाको पनि अहिले कान्ति बाल अस्पतालमा नै उपचार भइरहेको महानगरीय प्रहरी प्रहरी परिसर काठमाडौंका प्रवक्ता डीएसपी प्रमेश विष्टले जानकारी दिए । डीएसपी विष्टले घटनाका सम्बन्धमा थप अनुसन्धान भइरहेको जानकारी दिए ।
